މި އިންސްޓިޓިއުޓް ހިނގަމުން ދިޔައީ މއ.ފަށުވި ގައި 05 ކުލާސްރޫމްއާއި އެކުގައެވެ. އަދި އިދާރީ 2 މުޢައްޒަފުންނާއި 06 މުދައްރިސުންނާއި އެކު އިންސްޓިޓިއުޓް ގައި ކިޔަވައިދެވުނެވެ. އަދި 2014 ވަނަ އަހަރުގެ އޮގަސްޓް މަހުގެ 1 ވަނަ ދުވަހު މއ.ކޮކޯގެ ގައި އިތުރު 4 ކުލާސް ރޫމާއި އެކު އިންސްޓިޓިއުޓް ގެ ޚިދުމަތް ފުޅާވެގެން ދިޔައެވެ. އަދި އިދާރީ މުޢައްޒަފުންގެ ގެ ގޮތުގައި 04 މުޢައްޒަފުންނާއި މުދައްރިސުންގެ ގޮތުގައި 11 މުދައްރިސުން ކިޔަވައިދެއްވަމުންގެންދެވިއެވެ. އަދި 2015 ވަނަ އަހަރުގެ ޖުލައި މަހުގެ ތެރޭގައި މއ.އާޕިޔާގައި އިތުރު 4 ކުލާސްރޫމާއި އިދާރީ 6 މުޢައްޒަފުންނާއި 17 މުދައްރިސުންނާއިއެކު އިންސްޓިއުޓް ގެ ޚިދުމަތްކުރިޔަށް ގެންދެވުނެވެ. އަދި 2015 ވަނަ އަހަރުގެ ނޮވެމްބަރ 1 ވަނަ ދުވަހުންފެށިގެން ޖަލުތަކުގައި ޤިރާއަތު ކޯސްތައް މި އިންސްޓިޓިއުޓްގެ ފަރާތުން ކިޔަވައިދޭން ފެށުނެވެ. އަދި މީގެ އިތުރުންވެސް އަތޮޅުތަކުގައި ޕްރަންޗައިޒް ކޮށް މި އިންސްޓިޓިއުޓް ގެ ގިނަ ކޯސްތަކެއް 2015 ވަނަ އަހަރުގެ ސެޕްޓެމްބަރ އިން ފެށިގެން ކުރިޔަށް ގެންދެވެއެވެ. އަދި އިދާރީ މަސައްކަތްތައް އިތުރަށް ހަރުދަނާކުރުމަށްޓަކައި އެޑްމިން އޮފިސަރުންގެ ގޮތުގައި 3 މުޢައްޒަފުން 2016 ވަނަ އަހަރުންފެށިގެން މަސައްކަތްކުރައްވަމުން ގެންދަވައެވެ. 2016 ވަނަ އަހަރުގެ މޭމަހުގެ 10 ވަނަދުވަހުން ފެށިގެން 2 ކުލާސްރޫމާއި އިދާރީ 2 މުޢައްޒަފުންނާއި 04 މުދައްރިސުންނާއި އެކު ވިލިމާލޭގައި ކިޔަވައިދޭން ފެށުނެވެ. އަދި 2017 ވަނަ އަހަރުގެ ތެރޭގައި މާލޭގެ އެކި ޢިމާރާތްތަކުގައި ހިންގަމުން ގެންދެވުނު އިންސްޓިޓިއުޓް ގެ ޚިދުމަތްތައް 1 ފުރާޅެއްގެ ދަށުން ލިބޭގޮތް ހެދުމަށްޓަކައި މަސައްކަތް ކުރެވުނެވެ.  މިގޮތުން 2017 ވަނަ އަހަރުގެ އޭޕްރީލް 2 ވަނަ ދުވަހު 14 ކްލާސްރޫމާއި، މީޓިންގ ރޫމަކާއި، ސްޕަވައިޒާސް ރޫމަކާއި، އިދާރީ އޮފީހަކާއި ލައިބްރަރީ، ކޮމްޕިޔުޓަރ ލެބް، ނަމާދު ކޮޓަރި ސްޓާފް ރޫމް އަދި ހޯލަކާއި އެކު މއ.ކޮށީގެ  ގައި ޚިދުމަތްދޭން ފެށުނެވެ. އަދި އިދާރީ މުޢައްޒަފުން ގެ ގޮތުގައި 18 މުޢައްޒަފުންނާއި ދާއިމީ މުދައްރިސުންގެ ގޮތުގައި 32 މުދައްރިސުންނާއި އަދި ރިސޯސް މުދައްރިސުންގެ ގޮތުގައި 22 މުދައްރިސުންނާއި އެކު ޖުމްލަ 72 މުޢައްޒަފުން މަސައްކަތް ކުރައްވަމުންގެންދަވައެވެ. އެހެން ކަމުން 2017 ވަނަ އަހަރަކީ އިންސްޓިޓިއުޓްގެ ޙަޔާތުގައި އެންމެ ތާރީޚީ އެއް އަހަރުކަމާ މެދު އެއްވެސް ޝައްކެއް ނެތެވެ.